கௌபாய் உலகம் கமான்சே..!

வணக்கங்கள் நண்பர்களே..!

மனுசங்களுக்கு புதுவிஷயம் எதுமேல் திடீர்ன்னு  ஆர்வம் அதிகமாகுதோ...அந்த சப்ஜெக்ட் ஆரோக்கியமான போட்டியா...பல படைப்புகள் சவால் விட்டு கிளம்புற புரட்சி எல்லா காலகட்டத்துலையும், எல்லா விஷயத்திலையும் நடந்துட்டு தான் வருது. புதுசா ஒரு ஜீன்ஸ் வந்த... போட்டியா பலது, புதுசா ஒரு டிவி சேனல் வந்தா...போட்டியா பலது, புதுசா ஒரு கார் வந்தா அதுக்கு போட்டி பலது...என மக்களை எது கவர்ந்தாலும், அதுக்கு ஈடுகொடுக்க படைப்புகள் கொட்டுவது தவறாமல் நடக்கும் பரிணாமம்..!

அப்படித்தான் இங்க 1985 to 1990 வாக்கில் பல காமிக்ஸ்கள் படையெடுத்து..! அதேபோல ஐரோப்பாவில 1965 to 1975 ல காமிக்ஸ் படைப்புகளை நோக்கி ஒரு படையெடுப்பு நடந்தது..! அந்த டைம்ல வந்தவைகள் அதிஅற்புதமான படைப்புகள், கதைகள், ஓவியங்கள்..! அப்படி பிரான்ஸ்,பெல்ஜியம்ல உருவான, சரித்திரம் படைச்ச, காமிக்ஸ் உலகத்துல என்னிக்கும் பேசப்படும் கதாபாத்திரம்& ஓவியர்கள் டின் டின்,கேப்டன் டைகர்,XIII,லக்கிலுக்,கேப்டன் பிரின்ஸ்,ஆஸ்டின் அண்ட் ஒப்பிளிஸ்,கமான்சே,ரிப்போர்ட் ஜானி, சிக்பில் என நமக்கு தெரிந்தவை.

அன்று உருவான படைப்புக்கு நிகராக...அவர்களாலே இன்று உருவாக்கமுடியவில்லை என்பதே நிஜம்..! முதல் இடத்துல இருக்குற tintin,Asterix பக்கத்துல நாம போகமுடியலைன்னாலும்...இரண்டாம் இடத்துல இருக்குற William Vance[XIII],Jean Giraud[கேப்டன் டைகர்], hermann huppen[கேப்டன் பிரின்ஸ்,காமன்சே],Morris [லக்கிலுக்] இவர்களின் படைப்புகள் திரு விஜயன் அவர்களின் முயற்சி மூலமா நமக்கு கிடைச்சது பெரிய லக்..!

அதுவும் ஓவியர் ஹெர்மெனின் படைப்புகள், அவர் தேர்தெடுக்கும் கதைகளம் யாருடனும் ஒப்பிடவே முடியாது..! அவரோட ஓவியங்களின் பாணி மனிதர்களின் எல்லா உணர்வுகளை, நம் கற்பனைக்கே எட்டாத உலகின் கடைகோடியில் உள்ள பயங்கரமான சூழ்நிலைகளை அப்படியே கண்முன்னே விரித்து காட்டும் சந்திவாய்ந்தவை..! அவருடைய படைப்புக்கு சரியான தினி போட்டவர் கதாசிரியர் Greg (Michel Régnier)

இந்த இருவர் கூட்டணியில் வந்த மாபெரும் சூப்பர் ஹிட் ஹீரோஸ் ரெண்டு பேர். அவங்களை தெரியாத ஐரோப்பிய காமிக்ஸ் ரசிகர்களே கிடையாது. முதலிடத்தில் இருக்குற ஹீரோ கேப்டன் பிரின்ஸ்.அடுத்து 'கமான்சே'.இந்த இருவரும் இந்த மாதம் ஒருசேர வருந்திருப்பது, என்னை பொறுத்தவரையில் சரியான வேட்டை..!

முதலில் கேப்டன் பிரின்ஸின் 'சைத்தான் துறைமுகம்'....

1986 ம் வருடம்...வெளிஉலகம் பற்றிய அதிக தகவல்கள் தெரியாத, எழுத்துக்களாலும், ஒரு சில போட்டோகள், DD டிவி மூலமாக பார்த்த ஓரிரண்டு  காட்சிகள் தாண்டி...பனிகடல் பற்றிய தகவல் தெரியாத காலகட்டம்..! பனிமண்டலக்கோட்டைகிற முதல் பிரின்ஸ் கதையில...படுபயங்கர கந்தகமலைகுகைகளும், சதையை கிழிக்கும் குத்து பாறைகளும், உடலை ஊனமாக்கும் வாயுக்கள் கசியும்..முடிவேயில்லாத குகைபாதையும் என் வாழ்வில் முதல் முறையாக காமிக்ஸ் படங்களில் பார்த்திருந்த சமயம்...! 

அந்த மூச்சு மூட்டும் குகையின் சூடேகுறையாம...அதே நினைவுல இருந்தப்போ வந்த சைத்தான் துறைமுகத்தின் பயங்கர பனி காத்து...இப்ப நினைச்சாலும் ஊசியா எலும்புல குத்துறது..! அந்த 14 வயசுல படிச்ச கதை எனக்குள்ள தோணின கலர் கனவுவை, நான் என் கற்பனையில வரைஞ்ச  ஒரு கலர் ஆர்ட் என்றுமே மறக்கமுடியாத படைப்பு..! இன்று அதை எடுத்து பார்த்தபோது..நானா அதை வரைஞ்சேன்னு ஆச்சரியமா இருக்கு..!

அன்று வந்த பாக்கெட் சைஸ் புக்ல நமக்கு தெரிந்த, பிரபல மக்கன்பேடா சுவீட்ஸ் கொடுத்த நண்பரின் கடிதம் வந்திருப்பது ஒரு குட்டி செய்தி....

அடுத்து கமான்சே....

இந்த கமான்சேவுக்கும் முத்துகாமிக்ஸ்க்கும் ஒரு தொடர்பிருக்கு..! அது என்னனா...முத்துகாமிக்ஸும் கமான்சே தொடரும் ஏககாலத்துல, ஒரு மாதத்துல ஆரம்பிக்கபட்டது தான்...அந்த தொடர்பு..! ஆமாம் இரண்டுமே 1972ம் வருஷம்,ஜனவரி மாசத்துல தான் ஆரம்பிக்கபட்டது..! இந்த தொடர் முடிக்க கிட்டத்தட்ட இருபது வருஷம் ஆச்சி.ஆகஸ்ட்,2002 ம் வருடம் இதோட கடைசி பாகத்தை போட்டு முடிவு செஞ்சாங்க..!  

Hermann &Greg இருவர் கூட்டணியில் உருவான கடல் வாழ்க்கை,கௌபாய் வாழக்கை என சாகசவீரர்கள் கைகோர்த்து வலம்வரும் கேப்டன் பிரின்ஸ்,கமான்சே இரு படைப்பும் , அட்டகாசமான பொக்கிஷங்கள்..! மாதம் ஒன்று என தவறாமல் வரும் டெக்ஸ்,டைலான் டாக் கதைகளின் சிறந்தவை பத்துக்கு இரண்டு தேறும்..! ஆனால் ரெண்டு வருஷத்துக்கு ஒன்று என வந்த கமான்சே கதைகள் பார்த்து பார்த்து செதுக்கிற ரத்தினங்கள்..! அதை தொடரவா ? அல்லது நிறுத்திவிடலாமா ? என விளிம்பு நிலை நாயகர் பட்டியலில் முதல் பெயராக இந்த தொடரை திரு விஜயன் சேர்த்திருப்பது...கமான்சே கதைகளை சாத்விகமாய் ரசிக்கும் சிங்கங்களை சீண்டி பார்க்கவே ஒழிய, நீக்கிபார்க்க என எனக்கு தோன்றவில்லை..! 

இந்த தொடரோட ஓவியர்....

பல வெற்றி தொடரின் எழுத்தாளர்...

பதினைந்து பாக தொடரில், சேர்ந்தே பயணிக்கும் கதாபாத்திரங்களை நீங்கள் நினைவில் கொள்ள ஒரு அட்டவணை...

செயன்னீ,சிப்பாய்கள்,விவசாயிகள்...வெள்ளையர்கள்,கறுப்பர்கள்..என்று உலகின் பல்வேறு மூலைகளிலிருந்தும் வந்து ஒரு அணியாகத் திரள்வது வன்மேற்கில் ஒரு புதுமையான சங்கதியே அல்லதான்.அவர்களுடைய வாழ்க்கை முறை எளிமையானதாக இருந்தாலும் அங்கே சந்தோசத்துக்கும்,உல்லாசத்துக்கும் குறைவேதும் கிடையாது...துப்பாக்கிகளும் விஸ்கி பாட்டில்களும் அங்கே  பிரதானமாக மக்களுக்கு கடும் உழைப்பே முதன்மை இலட்சியம் ! அதுமாதிரியான கட்டமைப்புகளின் பட்டியலில் முக்கிய இடம்பிடிக்க போராடும் 666 பண்ணை சந்திக்கும் கஷ்டங்கள், பிரச்சினைகள் பற்றிய அருமையான தொடரே 'கமான்சே' என எடிட்டர் குறிப்பிட்டு துவங்கிய இந்தகதையின் முதல்  

 நான்கு தொடரின் கதை மறந்தவர்களுக்கு, மீண்டும் ஒருமுறை நான்கையும் படிக்க தூண்ட...கதைசுருக்கம்...

டைகரின் கதைகள் கூட உண்மையான கௌபாய் கதை அல்ல..! உண்மையான கௌபாய் உலகை நம் கண்முன்னே காட்டும் மெகா ஹெட் தொடர் 'கமான்சே' கதையே..! இப்படி ஒரு கதை இனி வரபோவதுமில்லை... இதுவரையில் இதுபோல் வந்ததுமில்லை..! வருடங்கள் பத்து உருண்டால் தான் நமக்கு பழசின் அருமை மெல்ல புரியவருகிறது..! சைன்ஸ் பிக்ஷன்,சூப்பர் பவர் ஹீரோக்கள்,மங்கா போல வெற்றிக்கொடிகட்டிய படைப்புகள் நோக்கி... நம் காமிக்ஸ் பயணம் தடம் மாறும்போது... இந்த கௌபாய் கதையின் அருமை உணர்ந்து படிக்கும்போது, மனதை நிச்சயம் ஏதோதோ செய்யும்..! மனதை புரட்டும்,எத்தனை முறை படித்தாலும் அலுக்காத இந்த கதையை...மி.ம. போலவே மொத்தமாய் பார்த்து ரசிக்க...நாம் மறுபதிப்பு போடுங்கள் என்ற முதல் கோரிக்கையே 2025 வருடம்தான் எடிட்டரின் முன் வைப்போம் என்பது என் கணிப்பு..!

இன்னும் பத்து வருடங்கள் கழித்து, இதை படிக்க தவறவிட்டவர்களுக்காகவே... கூடுதலாக இரண்டு காபிகள் வாங்க திட்டமிட்டு என் போக்கை நினைத்து..... ஹாஹா...நானே சிரிக்க ஆரம்பித்து விட்டேன் என்றால் பார்த்துக்கொள்ளுங்களேன்...! இந்த தொடரின் அருமையை, என் முயற்சி கொஞ்சமேனும் உங்களுக்கு உணர்த்தியிருக்கும் என நம்புகிறேன்..! உங்கள் பிரதிகளை இப்போதிருந்தே பத்திரபடுத்த ஆரம்பித்துவிடுங்கள்..!

இனி வரும் காலங்களில் ஒர்ஜினல் அட்டைபடங்களே வரவாய்ப்புள்ளதால், அதன் பெரிய அளவின் படங்களை இங்கே போட்டு, எடிட்டர் அட்டையாக பெரிய அளவில் போடும்போது ஏற்படும் உணர்வை கெடுக்காது... மொத்தவரிசையையும் சின்னதாக போட்டுள்ளேன். அதேசமயம் ஒவ்வொரு கதையிலும் ஓவியர் ஒரு முக்கால் பக்கத்திற்கு அசத்தலான ஒரு சீன் பெரிய ஓவியமாக போட தவறுவதேயில்லை..! நான் ரசித்த பெரியசைஸ் படங்களை வரிசையாக பதிவிட்டுள்ளேன்..! பார்த்து ரசியுங்கள்...இந்த தொடரின் சிறப்பை உள்வாங்குங்கள்..! இடையில் ஏதும் தோன்றினால் கமெண்ட்ஸ் ப்ளிஸ்..!

நட்புடன்
மாயாவி.சிவா